| HOME |BUULDERBUK |ACTIVITEITEN |FOTO'S |UITSLAGEN |GASTENBOEK | |
| Zittingen | Boerenbruiloft | Bokkenblaaike |
Zittingen
BUULSE ZITTINGEN:
UN GIGANTISCH SHOWSPEKTAKEL!!
Iederieën, maer dan óch wêrkeluk iederieën, die nao ieën van de zittingen van De Buulder Buk is gewist was vol lof en dolenthousiast over wa er allemaol te zeen en te huren was. Mej un schitterend neej decor en professioneel geluid en belichting van W-S-S-Soud&light oet Maores, is ut ieën van de bêste zittingen öit geworen. Vanâf dae ut begós tot aen ut lêste tow was ut énne gröte show vol zang en emotie, dans, cabaret, humor, grappen en grollen, gieren en brullen.
Mej me ut begin was ut al un gröte verrassing. Al zingend, begeleid door de onovertroffen muzikanten van Hofkapel De Bloasbuk, opende ozze onnavolgbare presentator Johan Kuup ut programma.
Naodae Preens Gerard, Prinses Carla en hun gevolg in de bak zaoten, hêmmen willie kunnen genieten van de traditionele ‘Gardedans’ wo mej Splash, dit jaor vur de 22e kier, de zittingen in Buul opende. Klasse wa Splash leet zeen! Me hunne showdans mej nao de pauze bewezen de meiden van Splash dae zillie nog steeds doorgruien in hun prestaties. Fantastisch, verrassend moi optreden!
‘Tirolicious’ is de nâm van de veer mechjes die mej ut ‘Bok en Rock festival’ de aandacht trokken. Reden vur de organisatie van de zittingen um dizze groep te strikken vur un optreden. En dae hân zillie goe gezeen en gehuurd! In ut begin nog wa lâst van zenuwen, maer laoter henne was dae over en mej hun optreden hân zillie er de sfeer mej in.
Drei tonpraoters wo onder de geroetineerde Jac Kuppens en Jo van Meijl en neej bie De Buulder Buk, Arian Compen oet Zurrik zörgden vur veul lachsalvo’s en applaus vur hun spitsvondige grappen en grollen. Jo van Meijl vertelde over zien ervaringen oet ut dâgeluks lèven van beddenverkoeëper. Grappen vur ut oprâpen dus! Jac Kuppens leet zoeas altiêd de ton leeg staon en wandelde as Driek, die nêrgens niks um geft al praotend en grappenmâkend over ut podium. Entertainment op niveau! Arian Compen zag zien eigen wel geschikt as de neeje burgemester van Craonendoonck. Me geraffineerde woordspeulingen en taolgebruuk me unne dubbele betèkenis wis hij ut publiek te boeien, wel goe luusteren! Unne gortdruuëge en biezonder knappe buut.
Op de urste zitting van de Buulder Buk trad de Buulse groep ‘Versleten Werk’ op. Zoe as verwâcht, topamusement! Sund dae ut bie dien enne kier bleef. Bie de volgende zittingen nâmp de Hellemundse groep ‘Spoit Elluf’ hun plak in. Drej Hellemundse manskèrels en ieën vrouw die zich heerlijk thoês vuulden op de Buulse Zittingen. Bie de zitting wo de Craonendoonckse wethawwers aonwezig wâren vertelden zillie, dae ze vonnen ‘dat Budel zo’n mooi gemeentehuis heeft. Dat ze daar in Budel wel zuinig op zouden zijn’. Un heerlijk optreden van de Hellemonders die ut klappen van de zwieëp kennen.
Nao ut optrejen van ‘Pluche Toelie’ wurdt altied vol verwâchting oêtgekeken. En óch dit jaor was hun programma wer unne voltreffer. Geïnspireerd door Ome Willem mej Joepie de Poepie, Jan Klaassen en Katrijn braochten zillie un dolkomisch programma me cabaret en prachtige zang. De gröte poppenkast wo in zillie zêlf de poppen waren, was moi en origineel bedâcht.
‘Dizzy’ is de nâm van unne neeje dânsgroep die ut publiek leet stuiteren van verbazing. Megaharde, supermoderne muziek en unne spetterende dans leet de zaol op zien grondvesten schudden. Un leuke en spontane jonge groep die demonstreerde wa de toekomst in petto hit.
Ozze Suisse Martin Horst begeleidde ‘De Buulse Blèèrköp’ as lêste cabaretgroep nao ut podium. De gebroeders Vos hoêven willie in Buul neet mier veur te stellen. Ieder jaor zien dees hieren in staot um op hoeëg nivo un optreden neer te zetten, dae ge echt neet wilt missen. Och muzikaal wieëten zillie van wânten. Dizze kier hân de gebroeders Vos zich laoten verstêrken door unne verde man. Ut publiek veel nog net neet van de stuul, maer tot ieders verbâzing stoond dao zoe maer pestoer Spooren tussen de ‘Vosjes’ op ut podium. En hoe!! As ‘âwd pastoorke’ vertelde pestoer Spooren hoe hij op zuuk was nao ‘Ut Gevuul van Buul’ en hoe hij zien bêst deej um bie de Buulse sâmenlèving te huren. Hoe dae hij perbeerde um de taol van ‘Dae aorig volk’ onder de kneej te kriêgen. Ongewild gruide de pestoer oet tot de absolute stêr van d’n aovond en gâf ós allemaol ut Buulgevuul. Pastoorke, bedânkt!!
Buul hit altiêd goei zittingen, dae is zeker! Maer zoe âf en tow springt er us un jaor oêt! En dae was now wer unne kier. Geweldig wa’n moi Buulse zittingen.
Zoe’n moi zittingen kriegde neet allieën door goei artiesten op de plânken te hêmmen, dao is mier vur noeëdig, meensen achter de schermen:
Vur de belichting, geluid en techniek: Bert Duisters, Martien Linders, Anthony Roost en de mannen van W-S-S-Sound&Light, hoofdsponsor van de zittingen.
Ut grimeren door Mara Goijens. De tenieëlmesters Adrie Duisters en Math Roost. De Commissie Bouw, die vur un moi aongekledde zaol en ut podium zörgt. Ut personieël van De Borgh en de Commissie Zittingen.
Allemaol bedânkt!
